Gulai Linggugh

Cerito Dang Tejo rimbak ini masiah seputar makan. Kemaghi, rombongan Delapan Penjuru Mato Angin berayak ke ghumah Beghuang Alas. Tuan ghumah tegagau, kareno kundang kantin tuh datang bekejut bae, nido ngejuak kabar sebelumo. Ughang kambangan tuh dang duo setum, minjam setum jemo kayo tegalau, Pak Rugat.

“Cacam, cacam. Nido gango ujan, nido ado angin, kito bemendah,” kato Beghuang Alas sambil ngeghatkah gerulunn. Naiak mato aghi, ble  mpai nian bangun tiduak.

Tamu nyo datang tuh antaro lain Dang Tejo, Ulagh Belang, Pak Geruak, Oom Gerutak, Pakcik Ngemburak, Rajo Begabus dll.

Jemo ghumah Beghuang Alas lah paham nian. Amun kundang kantin laki tuh berayak, nido urung lagi nyiapkah makan. Cuman di ghumah, dang krisis batan gulai. Ado taghuak kangkung, teghung, ngan jantung pisang dikit nian, nido kah cukup. Untunglah nian ado linggugh (sejenis labu sayur mengandung banyak air) duo buah besak.

“Nah inilah batan gulai,” kato jemo ghumah Beghuang Alas. Niak  Ino nih langsung ngajungkah cucung nyo paling ngingilan mbeli keredincis (ikan sarden kaleng) ke warung. Langsung bae Niak Ino nak beghanak cucung becucung rukbabu nanak nggulai.

Sambil nunggu gulai masak, ughang kambangan tuh makan penyaram pisang rawas, ngabiskah aiak kupi secerek besak. Pas bae, limpas tengaghi gulai lah masak, Beghuang Alas ngajak mendah banyak tadi makan gulai linggugh undak dencis.(sop)