Selam Keribuak

selam keribuak adau-adau sajau kegiatan anggota delapan penjuru matau angin selamau masa reses. kemaghi, ughang kambangan tuh berayak ke ghumah niduk manan di kota manna. rumbungan nyo datang antarau lain dang tejo, ulagh belang, oom gerutak, rajo begabus,  pakcik ngemburak. amun beghuang alas dang sibuk di lokasi proyek. sampai di ghumah niduk manan, udim makan siang, dang tejo ngan kundang kantin bermufakat (cuman bukan bersengkongkol), ndak bedalak ikan di aiyak manak. “kitau bedalak ikan kudai di lubuak kernapau lembak dusun padang berangin,” katau niduk manna ngajak kundang kantin. lah bebeghapau aghi ini, di bengkulu selatan dan sekitar dang cuaca panas. jadi, aliran aiyak manak jegheniah. lemak numbak ikan  dalam lubuak.   ughang kambangan tuh kan berasal jak di dusun, waktu masiah keciak dulu lah biasau nian beghusiak, selam sughuak di aiyak  batang aghi (sungai). mbak kini umur lah tuau, gumbak lah nyepuah ngan uban, perembak waktu keciak ndak diulangi. “padek itu. bernostalgia, napak tilas, sekaligus bedalak ikan,” katau dang tejo. limpas tengahi kemaghi, lah bam belambam nian ughang kambangan tuh terjun ke lubuak di lembak desa padang berangin kecamatan kota manna. niduk manan nyiapkah limau pucuak tumbak ikan, lengkap dengan limau buah kacaumata khusus nyelam. kekalu nian kundang kantin tuh tahan nyelam sampai ke dasar  lubuak. apau ndak dikatau. waktu masiah keciak memang padek dalam urusan nyelam. lah umur tuau, ndiak tahan lagi. mpai nyelamkah palak dikit, masiah jauah ngan dasar lubuak, nafas lah sengkak sengkih. mau tak mau gegancang nimbul ke permukaan. “ini gegara neman igo ngudut (merokok berat),” kato ulagh belang nyalahkah diri. dang tejo lah luak itu pulau, mpai sampai ke pertengahan kedalaman, palak ble teghasau sakit, gegarapa aiyak masuak tebuak telingau. “amun dipaksaukah pacak tuli,” katau ble sambil ngguriak tebuak telingau. oom gerutak ngan pakcik ngemburak samau sajau. ngapau pulau, aiyak ndak masuak tebuak idung, padahal lah berusaha nahan nafas. amun rajo begabus, cuman pacak kiciak besak bae. ble masiah kekapul di permukaan aiyak. ndiak  nian pacak nyelam. cuman niduk mana nyo hampir sampai ke dasar lubuak. ble mpai tekinak ikan sema libagh mbak hape, cuman ndiak tahan lagi ndak benafas. empat kali ble ulangi nyelam, samau sajau. mpai tekinak ikan, nafas ndiak tahan lagi. “cacam, tuau umur aku ikak selam sughuak di lubuak ini,” katau ble semamam. kekirau jam tigau petang, ughang kambangan tuh sepakat mengakhiri petualangan di lubuak nyo tekenal dengan pisungan ganas. amun luak inilah kepandaian kitau katau dang tejo, rimbak ini belum kah buliah ikan. masiah dipaksaukah jugau, kekalu bebayau (berbahaya). “daripadau tebenak, lemaklah udimkah kudai,” katau ulagh belang. ble lah mulai menggigil kedinginan. memang sebelum ughang tuh berangkat menuju lubuak. cucung niduk manan nyo paling tuau lah ngingatkah niak anang.  umur lah tuau, jangan lagi selam sughuak di lubuak, kalu bebayau. kalu ndak ikan lemaklah mbeli. “amun ndak cak gandak benenang, pegi sajau ke dusun lubuak langkap. aiyak sughut, cocok nian untuak badah bedenang datuak-datuak,” katau ble ngucak niak anang ngan kundang kantin. lah terbukti nian, datuak-datuak tuh cuman pacak  selam sughuak, beghusiak luak budak keciak. “agikah niak anang. tadi awak lah aku ingkatkah,” katau cucung psak nginak ughang kambangan tuh baliak kedinginan. (sop)

Tag

Share

• 
• 
• 
• 
•