Gelpung Bekayu

Petang kemaghi Dang Tejo Sorono encabut bekayu di belakang ghuma. Lanang tu lah ghindu nian makan gelepung bekayu atau ubal ubal.

Tapi Dang Tejo nido endak gelepung nyo dimasak pakai gulo abang. Lanang tu ndak mbuat gelepung nyo dimasak pakai ayiak sajang langsung.

Bekayu lah udim dicabut tapi ble bingung ndalak ayiak sajang. Betanyolah ble dengan kekawan di grup WA para aktivis Ngo, dimano lukak badah mbeli ayiak sajang.

“Ading ading sekalian, bantu kudai, dimano lokak bedalak ayiak sajang ni,” kato Dang Tejo.

Ulagh Belang nyo bealamat di Kabupaten Kaur langsung ngighimkah foto tetangga ble nyo lagi nganyun adan.

“Datanglah ke sini Dang, tetangga aku ni mpai netak nian adan baghoan. Banyak tegalo ayiako,” kato Ulagh Belang.

Lang Sikap ngan Setuo Buluah jugo ngighimkah foto kancah jemo lagi masak gulo abang.

“Datanglah ke sini Dang banyak ayiak sajang disini. Nido pulo ndak mbeli. Kalau Cuma ndak numpang minum, segending buliah,” kato Lang Sikap.

Terakhir Beghuang Alas, lanang tu paham kalau Dang Tejo tu lagi serius.

“Dighi Datang Bae ke daerah Seluma nyo paling dekat dengan Kota Bengkulu Dang. Di situ kelo dighi betanyo bae dimano badah jemo mbuat tuak. Nah datanglah dighi ke situ, banyak ayiak sajang di situ,” kato Beghuang Alas.

Dapat informasi A1 jak Beghuang Alas tu, Dang Tejo langsung nempuras. Nido pulo lanang tu ndak betanyo lagi di jalan, ble lah paham nian daerah badah jemo banyak mbuat tuak tu.

“Aku numpang beli limo liter bae ayiak sajang ni. Tapi bukan nyo lah njadi tuak,” kato Dang Tejo.

Singkat cerito lasung Dang Tejo mbuat ubal ubal bekayu. Foto ubal ubal tu ble kighimkah pulo ke gerup WA. (nad)