Ke mano bae Bedul selamo bebeghapo aghi ini? Anak lanang semato wayang Dang Tejo tuh ngerayau ke Ilir Talo Kabupaten Seluma, temalam di gumah kawan. Petang Minggu, ble nyenjuo ikan guan di sekitar Rawah Indah, umpan bekatak dengan nggelang (cacing tanah). Pakai biasan (tetaran) buluah mumpo. Ini mancing caro lamo nian. (Amun ejaan Alas Maras, disebut ikan ghuan, amun di Talo jadi ikan guan).
Banyak dapat Dul? Yak, jangan dikato Bro. Mpai ngenjalkah umpan ke aiak siring di kawasan kebun sawit tuh, langsung disambar guan besak, ncelakuuuup. Saking besak ikan, aiak rawang Rawah Indah beginiah luak dikudak buayo. Bedul lah lihai nian njenjuo guan, belajagh dengan Dang Tejo, Bak ble itulah.
Kekiro bekatak besak umpan jejuo tuh lah masuak ke kelungkungan guan, pancing langsung ble hajar. Lamo jugo ble bekesiak. Ikak sekuat saling unjun dengan ikan guan, Bedul tepelanting masuak siring. Cacam-cacam, basah galo celano ngan baju anak lanang Deng Tejo. Cuman ble beruntung, ikan guan nyo nangkap pancing besak mbak lengan.
“Nido ngapo mpuak nanggung, dapat ikan besak,” kato ble ngantiak dengan kawan.
Nyenjuo selamo sepatang ragat, Bedul dapat ikan guan selawiah (25) ikuak. Ukuran rato-rato mbak lengan. Ado sikuak nyo mbak kembung betis. Pulian mancing tuh dibatak galo baliak, batan bahan laporan dengan Mak, mangku nido keno marah.
“Makku sayang pasti riang. Anak lanang baliak mbatak lukak banyak,” kato Bedul melapor dengan Mak, pas ble sampai ke anjung di kebun jagung di Teluk Sepang.
Lah yo nian, Mak riang tegalau nginak anak lanang mbatak oleh-oleh. “Cacam anak lanang, di mano pulo mbeli ikan guan sebanyak ini,” kato Mak.
“Basing bae ngiciak pulian mbeli, pulian aku nyenjuo di Iligh Talo,” kato Bedul purik.
Dang Tejo nyo mpai baliak jak di ghumah Pak Rugat, ngikut riang pulo nginak Bedul dapat ikan guan banyak tegalau. Nido urung lagi, mulai jak malam kemaghi, ughang betigo tuh (Dang Tejo, Bedul, Mak Bedul) pesta gulai guan. Ado nyo dipindang luak caro Wong Palembang. Sebagian digulai undak gebung asam. Sebagian lain disimpan dalam kuklas batan ndak digulai pagi luso.
Heehe, Pakwo Rugat mintak jatah pulo gulai guan undak gebung. Jemo kayo tegalau tuh keruan keluarga Dang Tejo pesta gulai guan gara-gara dikighimi gambar oleh Bedul melalui medsos grup Delapan Penjuru Mato Angin. “Bravo Bedul.” (sop)