Ibau Cucung

Nido teghaso, ruponyo umur Dang Tejo Sorono lah mulai sayar. Empak imboan ble lah becucung galo. Sementaro Dang Tejo belum keruan tipatannyo.

Tengaghi kemaghi Dang Tejo Sorono temenung duduak di berendo ghuma. Ruponyo Dang Tejo lah ghindu ndak nimang cucung. Tapi keinginan lum keruan kebilo keinginan tu pacak tewujud.

Anak bujang semato wayang Bedul Mustafa Satria Raja Mandala memang tekenal banyak jemo ribang, tapi lanang ganteng tu lum serius. Bedul lum ndak betunaan. Ble masiah ndak idup bebas, njalankah hobi ngeliambang persis luak Dang tejo masiah mudo dulu.

“Ngapo kamu temenung ni Dang,” kato Ncekwo Sofiyah sambil meletakkah kupi segelas besisiak ngan guring sukun sepiring cembung.

Dang Tejo ceritokah ngan Ncekwo baso ble lah ghindu ndak nimang cucung. Tapi nampako bedul lum pacak diaghapkah dalam setaun duo ini. 

Saking Dang Tejo lah ndak nian benantu, lah tigo kali lanang tu nyiapkah sapi pemunggah. Tapi tepakso dijual kareno Bedul lum jugo ado ringit ndak betunaan.

“Sabar Dang, kalau ngingatkah kamu dulu, masiah limo taun lagi anak kito ni bebini. Kamu dulu kalau bukan aku nyo ngotot nian, kalu lum pulo kah nikah sampai kini,” kato Ncekwo Sofiyah sambil ngibit peghut Dang Tejo.

“Jangan kamu kiciakkah ngan Bedul cerito ini, pacak tambah lamo bae lanang itu mangku bebini. Aku lah ndak nimang cucung. Kamu ajunglah dio tu bebini,” kato Dang Tejo. (nad)