Kemaghi, Dang Tejo dengan kundang kantin bepapuk nebang sawit. Nido pulo banyak nian, kekiro tujuah batang, besak keciak. Ado sawit lanang, ado pulo nyo bebuah lebat. Ughang kambangan tuh sengajo nian nebang pakai kapak, nido pakai sinso (chain saw). Tujuannyo supayo lebih asyik, caro dulu pakai kapak dikukut nggunokah tali jangat.
Sawit nyo ditebang tu punyo Ulagh Belang, Lanang keciak bekumis tebal tu mintak tulung nebag sawit tu kareno lokasi itu ndak dijadikah lahan pembangunan ghuma. Ulagh Belang ndak mbuat ghuma baru, sementaro ghumah lamo diwariskah dengan anak ble nyo mpai udim betuna’an.
Dang Tejo nebang sebatang. Dapat kapak tumpul. Ikak bepapuk, tangan ble meletugh.
“Yak kebilo mangku rubuah Dang, lah litak kami ngecakkah jangat nih,” kato Ciput Muaro nyo kebagian ngukut tali. Dang Tejo teghaso nian litak, peluah ble lah muirap-irap, melancugh jak siku.
“Bukan nian kerjo jemo lah tuo nebang nih,” kato ble kelita’an. Nido urung lagi, dighumah Ulagh Belang nggulai umbut luak ado acara jamuan besak. Gulai dibagi-bagi dengan kundang kantin nyo nulung nebang. Mak Bedul dapat kighiman pulo gulai manis umbut jak jemo ghumah Ulagh Belang. (sop)