Memantai petang, mutur bughuak Dang Tejo lah gegibik di Betungan Kota Bengkulu. Jerang lagi sampai di ghumah di Pagar Dewa.
Peghut lah neruduk mintak diisi, kareno tengaghi tadi nido sempat makan. Lanang tuh ngadokah pertemuan dengan petinggi-petinggi partai di Bumi Serasan Seijoan. Masalah nyo dibahas nido pulo penting nian. Masiah seputar pembagian dana pembangunan. Jangan sampai semboyan Seluma nih begubah jadi Bumi Serasan Seijoan Nido Sepembagian. Nido tetago lagi nahankah lapagh, ble singgah di warung lesehan di muko SPBU Betungan. “Nasi uduk, guringan keli, pakai ulam dan sambal. Jangan lupo aiak kupi segelas betangkai,” kato lanang tuh merintahkah budak-budak gadis tukang tepiak. Singkat cerito, nasi lah licin, aiak kupi tekeghing, Dang Tajo melanjutkah pejalanan baliak. Pas sangkup malam sampai di ghumah. Anak lalang ble, Bedul Satria Mustofa Raja Mandala (belum SH) dang nyangkari ayam. Mak Bedul dang rebabuk nyiapkah makan malam. “Magas kito malam nih Bak. Gulai palak ikan gebur undak ghebung sebelango besak,” kato Bedul ngucak bapak ble masiah litak tuh. Dang Tejo diam bae, sambil bemumut dalam ati. “Tetipu kaba Dul, bapak nih lah kenyang melantakkah pecal lele enam ikuak.” Udim nupangkah mutur, lanang nyo gumbak lah nyepuah ngan uban tuh mandi. Ncekwo Sofiah diam bae. Mak Bedul tuh dang purik, kareno laki nih masiah kilah ngeliambang ngelilingi denio angat. “Lah seminggu ngerayau, mpak baliak ke pangkalan,” kato Ncekwo dalam ati. “Untung laki tuh masiah baliak Ncekwo.” (sop)
Kategori :