Gudung Sangsilo

Sangsilo baso Serawai, samo dengan keliki, kates, pepaya.  Amun sangsilo lanang nido bebuah, cuman gudung (pucuk) dicampur bungo, lemak nian disayur alias digulai. Gudung sangsilo teghaso pait, apolagi dimakan matah (mentah).  Nah, Dang Tejo pacak nian masak gulai gudung sangsilo. Amun lanang ini nangani dio, nido nian teghaso pait, paling teghaso kelat (sepat-sepat) dikit.

Kemaghi, ceritoyo,  jaringan Delapan Penjuru Mato Angin bekumpul di ghumah Pak Rugat. Di pinggir kolam ikan jemo kayo tegalau tuh banyak tegalau batang sangsilo.

“Tebangi kudai sangsilo lanang nyo lah tinggi, gudungo kito gulai,” kato Pak Rugat merintahkah jemo banyak tuh. Nido ganju lagi, ughang kambangan tuh begerak serempak. Bepapuk nebang batang sangsilo nyo lah tuo. Sebagian ngukugh niugh, sebagian lagi ningguak api, nughunkah kancah. Bayangkah, saking kah banyak sangsilo Pak Rugat, ado duo kancah nyo digulai. 

“Cacam, cacam pacak nian Dang Tejo meracik bumbu, nido nian teghaso pait,” kato Jenifer Lupis. Kenan lah ndak pulo ngangkat Dang Tejo njadi kepalo koki warung makan. Gudung ngan bungo sangsilo dimasak undak ikan asin, pakai bumbu nuigh digonseng. Makan nasi angat ulam jeghing mudo. Ughang kambangan tuh tekedadang kekenyangan galo. Beghuang Alas sampai tujuah kali nambuah. 

“Cacam, sepepado sanak, amun lah banyak igo diisi, bedit teghaso sakit,” kato Ulagh Belang nengul (negur) Beghuang Alas nyo masiah nyuap smbil dedebis beghesin. (sop)