Ikan Nyakai

Dang Tejo Sorono ngan Ncekwo Sofiyah repot akap kemaghi. Ughang duo serekanan tu nemu ikan palau nyakai. Unjut besak peranti mbatak nasi gulai ke kebun penuah dengan ikan. Ditambah gerunang ambinan Dang Tejo melumbap pulo.

Cerito ni beawal waktu Dang tejo ngan Ncekwo Sofiyah ndak berangkat ngaruakah kebun kupi di ulu ayiak. Rencano Dang Tejo ndak nunas sekalian mupuhi buah kupi semughak duo. Sementaro Ncekwo Sofiyah ndak nyiangi pasigh anjung. Jadi waktu musim kelo lah lemak temalam kalau anjung lah siang.

Waktu nyembeghang ayiak anak ngancam ataran kebun tu, Dang Tejo tekinak ikan palau nyakai. Sebagian ikan tu lah kekeghingan, sebagian lagi masiah ulu iligh bedenang.

Singat cerito ughang duo tu urung ke kebun. Dang Tejo langsung nebang buluah betung ngan ngambiak angas angas batan mbuat tengkalak. Tengkalak tu langsung dipasang dibagian iligh ayiak anak.

Sementaro Ncekwo Sopiyah nggiring ikan palu tu supayo bedenang ke iligh mangku masuak tengkalak. Seinggonyo tengkalak besak buatan Dang Tejo kemak dengan ikan palau.

Saking banyak puliahan, nido keudiman lagi ncepai peghuto. “Kito baliak kudai Mak Bedul, Pagi pulo kito ngulang ke kebun. Tengkalak ni nengkelah kudai tepasang, tak aruahan pagi,” kato Dang Tejo. (nad)