Ngidak Lempuak

Kemaghi, lanang kayo tegalau, sekaligus sesepuh Jaringan Delapan Penjuru Mato Angin mbeli deghian duo setum pick up. Rombongan Beghuang Alas cs temangah, ngapo Pak Rugat mbeli deghian sebanyak ini. Apo  kelebihan tanci, apo dang purik?

Bukan purik, memang lah ble rencanokah nian. Mpungan jemo banyak nih dang ngmpul, ble ajungkah mbuat lempuak alias lempay. Nido nganju lagi ughang kambangan tuh bekesiak nuruti perintah Pak Rugat. Beghuang Alas bagian nekang deghian, Ulagh Belang ngepulaskah ijat. Dang Tejo bagian ningguak api. Bayangkah dengan adiak sanak, beghapo banyak lempuak alias lempay deghian duo setum pick up.

“Dapat nian gawe kito rimbak ini,” kato Beghuang Alas sambil dedebis beghesin.

Dang Tejo mbuat tungku jak tumpuak batu bata untuak delapan buah kancah (belango besak). Lokasi masak di pekarangan belakang ghumah Pak Rugat. Luas pekarangan tuh nido kurang setengah hektar. Maklumlah, ble jemo kayo tegalau.

Lah selelimungan malam, lempay mpai masak.

Pak boss Pak Rugat cuman mintak jatah duo kancah. Batan ndak ngenjuak mitra bisnis di Jakarta, separoh disimpan di ghumah batan ngenju’i  tamu. Enam kancah lagi dibagi batan rombongan Delapan Penjuru Mato Angin nyo ikut betulungan masak.

“Mangku nido ribut, Dang Tejo jadi koordinator pembagian. Beghuang Alas koordinator tukang bungkus,” kato Pak Rugat.

Ughang kambangan tuh riang tegalau. Amun baliak ke ghumah mbatak rerubo (oleh-oleh) lempuak deghian asli, nido keno pangut dengan jemo ghumah.

“Pasti cucung aku riang nian nginak Niak Anang mbatak lempuak,” kato Beghuang Alas. Yaaak, auuu niaan Niak Anang. (sop)