Ketagihan Pendap

Ketagihan aiak kupi, urusan gampang coy. Di mano-mano ado jualan lebuak kupi.

Amun Bedul ketagihan pendap,  pasti merepotkah Mak. Di Kota Bengkulu agak susah bedalak pendap. Sabtu mpai nih, anak lanang semato wayang Dang Tejo tuh ngentak began ndak makan gulai pendap. Ble ngakuak palak pening, persis luak ketagihan kupi.

“Pengina’an aku beligat, lah tigo  bulan nido betemu  dengan pendap,” kato Bedul ngiciak dengan Mak. Lamo-lamo, lanang ngingilan nih tambak neningkiak.

Giliran Mak palak pening.  Amun Dang Tejo tenang-tenang bae. Ble malahan setuju dengan kekenda’an Bedul. Lah ghindu nian dengan ikan beserano lengkap, dibungkus daun kemba’ang tuh. “Pendap  banyak di Manak (Kota Manna). Luak apo aku bedalak,” kato Mak Bedul kebingungan dengan kekenda’an anak lanang.

He, heheee. Dasar Bedul celia. Ado bae ide ble, nido kah tekedan.

Ble  nelepon Niduk Manan di Kota Manna, mintak kighimi pendap.

“Bak palak sakit ketagihan pendap. Lah lamo nido betemu, awak titu selera ble nian,” kato Bedul mengatasnamokah bapak ble. Ndiak  nganju lagi. Minggu kemaghi, Niduk Manan merintahkan jemau ghumah ble, mbeli pendap di bada  langganan di Pekan Kutau.”Belikah ndak sepuluah bungkus. Sekalian aku ndak ngighimi Pak Rugat,” katau Niduk Manan sambil ngenjuakkah tanci. Berupuak Niduk Manan dalam ati. Ini pasti akal-akalan Bedul. Mano ado jemau di denio angat nih ketagihan pendap.  Amun ketaighan kupi atau ngudut, mungkin.

Singkat cerito,  petang Minggu, pendap lah sampai di anjung di Telung Sepang, dibatak setum travel jak di Kota Manna. Limo bungkus batan Bedul, limo bungkus dinjuakkah dengan Pak Rugat. Nido nganju lagi, Bedul langsung nciduk nasi angat jak dalam mejik jer (magic jar). Nasi nyo masiah beghasap tuh ble lantak, pendap sebungkus lebar dengan Bedull sughang. Lemak tegalau kato ble, apalo lagi dilengkapi dengan ulam petai. “Lemaklah ini daripado tetanjal di  napal,”kato  Bedul ngiciak dengan Mak.

Nggilingkah palak (geleng kepala) Mak nginak perembak anak lanang tuh. Dang Tejo ngikut riang. Diam-diam ble nciduk nasi pulo. Samo-samo kekenyangan.(sop)