Urung Selfie

Sesuai dengan julukan, Pak Geruak memang galak nian nggeruak. Kemaghi, lanang bejanggut keghas jejarangan tuh ngajak Dang Tejo, Beghuang Alas, ngan Ulagh Belang bedalak ikan di Muaro Ngalam. Segalo jenis jaring dibatak, nido  lupo mbatak pancing.

“Kito ndalak ikan, sekalian aku ndak selfie dengan buayo Muaro Ngalam,” kato ble.

Dang Tejo mempeingatkah, amun ndak ndalak ikan di sungai, jangan nian kiciak besak atau nggeruak dengan nyebut namo buayo. Kalu betemu nian, urung ndalak ikan.

“Aii, biaso bae. Nido kah ngapo, aku  ndak befoto di atas palak buayo,” jawab Pak Geruak ngingilan. Dang Tejo diam bae, ble ndak mbuktikah kebeghanian lanang tuh.

Singkat cerito, sampai di Muaro Ngalam, Beghuang Alas duluan sekali ncebur ke dalam aiak. Lanang besak tinggi tuh mbetangkah jaring sambil dedepus ngudut.

Jak di daghat lah kinaan aiak nyo agak keghuah tuh beghiniah. Pak Geruak lah mulai takut. Bla mpai teghingat, sebelum berangkat tadi nggeruak ndak selfie dengan buayo tunggu muaro. Jangankah selfie, mpai ndak ncebur ke dalam aiak keting ble gemetagh. Kelalu nian ado hewan nyo pacak idup di daghat ngan aiak tuh muncul.

“Kelo keting aku nih ditangup buayo,” kato ble dalam ati.

Dang Tejo ngan Ulagh Belang lah ncebur nulungo Beghuang Alas masang jaring.

Amun Pak Geruak masiah tecegir di pinggir, nido beghani tughun.

“Luak apo sanak, lasung nido ndak selfie. Mbak kinilah,”kato Beghuang Alas nyindir kawan nyo kiciak besak tuh. Pak Geruak cecengiah, malu dengan sesumbar ble tadi.

“Aku bukan takut, badan nih nido sehat nian, asokah demam,” kato ble mbuung.

Beghuang Alas ngakar tetawo ndengagh alasan nyo dibuat-buat tuh. Itulah akibat kiciak besak ndak selfie. Mpai nginak aiak beghiniah, demam bekejut. Hehee, sesuai pulo dengan julukannyo, Pak Geruak cuman pacak nggeruak bae. (sop)