Senok Perenggi

Kemaghi, anjung Dang Tejo di Teluk Sepang ditandangi kundang kantin Bedul. Budak bujang banyak dang naiak meghanjak tuh sepakat alias mufakat masak senok perenggi (labu kuning). Kebetulan di dapugh anjung tegerulik duo buah perenggi besak mbak cegur(cegur= batu pembeghat lesung).

Gulo ulu alias gulo abang alias gulo enau ado pulo tigo tampang bata’an Dang Tejo waktu ble berayak ke Manak minggu mpainih.

“Pakwo, luak apo amun kami masak senok perenggi,” kato kawan Bedul, minta izin.“Amun aku nido nian melarang. Lah lamo nido makan senok, jawab Dang Tejo.

Nido nganju lagi budak kambangan tuh bepapuk bekerjo di dapugh. Ado nyo ngubak perenggi, ado nyo ningguak api pakai puntung, ngukugh niugh. Kekiro sejam lebiah, lah masak nian senok perengi sedandang besak.

Nido pulo  lamo, senok nyo masiah panas beghasap-asap tuh lebar dilantak jemo banyak tuh. Dang Tejo kebagian duo piring besak.

 “Cacam-cacam, alakah pacak budak bujang banyak nih masak senok,” kato  Dang Tejo. Ble lah tesadai kekenyangan, nido kungang lagi meghumput kebun jagung.

Masalah mulai timbul, wakau Mak Bedul baliak jak kebun para petang aghi tuh.Mak nginak tigo duo buah perenggi besak mbak cegur tuh lah kunam nido ado lagi.

Di badah pencapaan sampah telungguak mulan (biji) perenggi. Nido nganju lagi Mak uring-uringan merugat. Dang Tejo ngan Bedul keno geredak (keno marah).

“Sapo masak perenggi. Nido pamit  dengan aku,” kato Mak sambil  selekah pinggang.Bedul ngan gaek lanang tuh cecengiah beghaiak bae, nido beghani njawab.Pantas bae Mak marah. Perenggi tuh  batan ndak bahan baku masak kue bolu. 

Menu mbak kini aghi, perenggi lemak nian dimasak jadi kue bolu. Nah, rencano Mak, kue bolu perenggi tuh batan menu bebuko puaso jerang lagi kan masuak bulan puaso.

Apo hendak dikato Mak. Perenggi lah lebar dimasak senok. Amun masiah enak jugo, bedalak perenggi lain. Nah, Dang Tejo ngan Beul keno sanksi oleh Mak. Wajib mengganti perenggi ditambah gulo enau. Siap, kato Bedul. (sop)