Salah Alamat

BUKAN judul lagu. Rimbak ini terjadi nian dengan Bedul Mustofa Satra Raja Mandala.  Kemaghi, anak lanang semato wayang Dang Tejo pegi berayak ke Bengkulu Selatan. Tujuan ndak ke ghumah kawan kuliah di Desa Tanjung Aur. Nah selamo bekawan, Bedul ndiak pernah betanyau Tanjung Aur manau dusun kawan tuh. Sedangkah di Bengkulu Selatan kan Tanjung Aur adau tigau, masing-masing di Kecamatan Bunga Mas, Kecamatan Pino, Kecamatan Pino Raya. Bedul lah tepelesat ke Tanjung Aur Kecamatan Bunga Mas. Lah tekeliling dusun ble betanyau, ndiak pediau jemau keruan.

“Besak keciak, tuau mudau, tinau lanang, ndiak pediau jemau dusun ini benamau luak kaba kiciakkah tuh,” katau jemau tuan dusun njawab pertanyaan Bedul.

Lah diitung, ndiak kurang 45 ughang jemau ditanyau, ndiak keruan galau.

Bedul lah mulai pusing. Sambil ngeregat, ble  betanyau di Bumi Sekundang Setungguan nih adau beghapau Tanjung Aur. “Adau tigau cung. Nyo cucung tuju Tanjung Aur manau,” katau datuak-datuak baliak nanyau dengan Bedul. Lanang ngingilan nih nggaghut palak, ndiak keruan pulau Tanjung Aur Manau.

Ble lah belalis nelepon kawan, hape ndiak aktif, kemungkinan ndiak besinyal. Nah, di tengah kebingungan, Bedul ngelepunur ke ghumah kawan gaek di Kota Manna, Niduk Manan. Lah udim makan tengaghi, ble bekebar tuapau tujuan berayak.

Pakwaw Niduk Manan tetaawau ngakak ndengagh ceritau Bedul.

“Luak judul lagu, Salah Alamat,” katau Pakwaw nganjari Bedul.

Lah diselidiki, keruan kalu kawan bealamat di Desa Tanjung Aur Kecamatan Pino Raya. “Cacam Dul, alakah jauah kaba sesat tuh. Seharusau, di Simpang Kelutum tadi nyimpang ke kidau. Ngapau  cecaka ke Muarau Kedurang,” katau kawan  madakkah Bedul.

“Jangan kiciakkah dengan kawan  lain. Maluan aku,” katau Bedul cecengiah.

Ini namauau hukum karma, gara-gara Bedul hobi nian mulakah (ngerjai) jemau.(sop)