Ditegur Polwan

Cerito rimbak ini masiah seputar Bedul Mustofa Satria Raja Mandala. Akap  kemaghi, anak lanang semato wayang Dang Tejo tuh keno tegur polwan. Gara-gara, ble melawan arus lalu lintas waktu ndak pegi kuliah. Lah melawan arus, waktu ado bundaran putaran, ble langsung bae bebelok. Sedangkan jemo banyak tuh, nyo pakai setum atau pakai mutur, patuh aturan. Maklum, jalan raya  di ibukota provinsi, bukan daerah pedalaman.

Dasar nian Bedul ngingilan, mpuak lah paham nian perembak tuh melanggar aturan, masiah ble terabas. Apo dikato, pas ble udim bebelok, langsung disemprit anggota Polwan nyo dang ngatur lalu lintas. Bedul nido kungang lagi ndak melarikan diri, kareno arus lalu lintas dang rami nian. Amun masiah kilah nerabas, kekalu dapat balak.

Mpuak kato lanang tuh melanggar aturan, anggota Polwan masiah tetap sopan.

“Selamat Pagi Pak,” kato Polwan nyo alap bekulit putiah tinggi ramping tuh. Langsung bae Bedul keno jijiah (pemberitahuan), baso ble lah bebuat salah, melanggar aturan.

“Bapak sudah melanggar aturan, sekaligus membahayakan orang lain dan diri sendiri,” kato Polwan tuh nceramahi Bedul. Dapat ceramah, Bedul  ngangguak-ngangguak, luak burung tekuku ngukun. Ble masiah beruntung nido keno tilang, cuman dapat cemarah bae. Mpuak kato ngingilan, lanang keciak ini bersikap gentelment.

“Salah nian aku, Buk, Mbak, Dek, eehh Ayuk. Aku minta maaf,” kato Bedul, sambil nggaghut palak entah gatal nian atau grogi neman igo ditegur  polwan cantik

Nginak lanang tuh gugup sekalian lah mintak maaf, polwan tadi tesenyum, sambil mempringatkah Bedul jangan lagi ngulangi perembak luak itu.

Nah, pas ble dang dapat cemarah tadi, tanpa disadri ado kawan kuliah ble memoto pakai hape. Nido urung lagi, foto Bedul keno ceramah di tengah jalan tuh nyebar di jaringan medsos kundang kantin ngan medsos jaringan Delapan Penjuru Mato Angin. Baliak ke ghumah, ble keno jijiah dengan Mak.

Amun Dang Tejo santai bae nanggapi perembak anak lanang tuh. “Biaso bae anak lanang dang naiak mengganjak. Cuman, jangan diulaangi lagi. Kalu bebayo sekaligus malukah Bak,” kato Dang Tejo nyindir luak adak.Anak lanang tuh cecengiah bae, luak adak pulo. (sop)