Panen Tighau

Kejadian tertangkap tangan, tampa’o jadi pelajaran berharga kalangan jaringan Delapan Penjuru Mato Angin. Kareno masiah masa reses, ughang kambangan beghadu kudai ngeliambang. Masing-masing konsentrasi dengan urusan keluarga kudai. Ulagh  Belang,  suatu misal.

Mulai kemaghi, lanang bekumis tebal nih  temalam di umo daghat di wilayah Seluma Utara.  Riang  nian ble nginak tanaman padi  siung kancil dang ngudung.  Niido lemo  lagi ngetam padi daghat siung kancil, rupuak ati ble. 

Sebelum musim ngetam, mbak kini ado  penghasilan selingan, serening macam tighau  dang musim mekar. Ado tighau kukuran (tighau gerigit), tighau putiah, tighau  tuwi, tighau bibigh dll. Kemaghi, lanang nyo biaso perlennte  tuh mutigh tighau. Dapat  sekeranjang (kinjagh) besak unyak. Ble langsung nelepon pedagang  sayur keliling.

“Ado  bisnis  dikit, datanglah kaba tuh,” kato  ble  nelepon miitra dagang.

Selain serening  macam tighau, Ulagh Belang jugo njual berbagai macam taghuak  tanaman. Ado  taghuak jibas, aghum, taghuak lumai, teghung, teghung kediro, kacang panjang ngan serening  macam batan gulai. Banyak  jugo ble buliah tanci  belanjo.

“Cacam-cacam, awak lemak amun luak ini. Lambat igo  aku  beumo daghat,” kato ble  ngiciak dengan tukang  sayur  nyo mborong  taghuak ngan tighau.

Selamo ini, ble ikak ligat kunam unjo kemuagh ngelilingi delapan penjuru mato angin. Mbaco kerjo semo, ndala’i apo bae nyo salah. Jemo lain salah galo, meghaso awak nyo paling benagh. Keluarga kurang diperhatikah, banyaklah pegi ke ulu  iligh luak ngenian.

Masa reses, dimanfaatkah ughang kambangan untuk introspeksi diri. Berbuat nyo lebiah bermanfaat untuk keluarga dan masyarakat.  Beghuang Alas, lah mulai pulo nggarap  kebun sawit, sambil sesekali mancing gaguak di Pantai Alas. Amun Niduk Manan,   memang giat bekerjo, merawat kebun sawit ngan kolam ikan, batan  tambahan tanci pensiun PNS.  Si jelita Julia Firiz jangan dikato.  Kenan semakin eksis dengan binis katering, dengan pelanggan instansi pemerintah, kantor bank ngan perusahaan swasta.

Luak itu jugo Jenifer Lufiz, cewek  semlohay nyo  mpai melibagkah  sayap binis  rumah makan khusus  gulai umbut di Kota Bengkulu.

Anggota jaringan Delapan Penjuru Mato Angin nyo malas bekerjo bakal ketinggalan secara ekonomi. Apo  kabar Dang Tejo? Heeehhee, sesepuh nih jerang lagi dapat belanjo besak. Kebun jagung seluas mata memandang alias ceput mato nginak, jerang lagi panen.

Anak lanang  semato  wayang, Bedul  Mustofa Satria Raja Mandala, makin eksis dengan ternak ayam. Ble  jugo njual taghuak ngan bumbu organik ke warung Tante Jenifer Lufiz. Duo minggu sekali nyemang brondol di kebun sawit Pakwo Rugat. Nah, petang kemaghi Dang Tejo dapat kighiman tighau  jak kanco ble Ulagh Belang. Dapat pulo kighiman tapo ikan gaguak jak Beghuang Alas.

“Mantap  nian, gulai tighau  undak tapo gaguak,” kato Bedul sambil nating piring bejubung  ngan gulai tapo gaguak undak tighau.   Peci lah nian Dul. (sop)