Ngeresayo Nugal

Lah lasung nian Dang Tejo bekebun jagung di lahan  Pak Rugat di Teluk Sepang. Kemaghi, ngeresayo nugal. Beniah jagung ado  duo kiding besak lebiah. Anak lanang Bedul Mustofa ngajak budak bujang ngan budak gadis kanco ble kuliah.

Dang Tejo nunggalkah aktivis Ngo jak delapan penjuru mato angin. Komunitas pecinta mutur bughuak jak Pagar Alam lah datang pulo. Lahan Pak Rugat seluas mato memandang alias ceput mato nginak, jak pinggir dusun nggut  pinggir laut tuh, lah sangkup ditanami jagung.

“Amun panen kelo langsung kito muat dalam kapal, disekpor ke Cina melalui Pulau Baai,” kato Bedul ngucak bapak ble. Lah kelar nanam jagung, Ncekwo Sofiah masiah sempat nanam lepang, kacang ngan sayur-sayuran.

Tradisi masyarakat Serawai, setiap ngeresayo, pakai pelampun serawo (nasi ketan kuah gulo enau),  undak gedhian tujuah baskom besak lebar ngan ughang kambangan tuh. Gulai ayam kampung tigo lusin ikuak lah kuncun pulo. Serening macam juadah,  gegelang, cucur bandan, bakwan, guring pisang lah nido pulo ado sisa lagi. Aiak kupi ngan aiak teh kekiro 10 cerek lah kering pulo.

Lah udim galo serening macam nyo ndak ditanam di lahan Pak Rugat tuh, ughang kambangan bepingkas baliak. Ulagh Belang ngan mandan ble Beghuang Alas paling celia memanfaatkan peluang. Sebelum nugal, ughang duo tuh masang tagang ghendam di siring irigasi. Dapat ikan ghuang kekiro sebesak kembung metis empat ikuak sughang. “Alangkah riang cucung aku nginak Niak Anang mbatak ikan besak, “ kato Beghuang Alas sembil dedebis beghesin. 

“Sapo nyo pacak memanfaatkah peluang, bakal dapat banyak lukak,” timbal Ulagh Belang sambil ngantiak  ghuan pulian nagang.

“Mongkeeeen, barang kali  luak itu nian,” kato Jefiner Lufiz sambil becermin ngina’i idung  ble luak jambu masak nyo mutung aghi.(sop)