Begetang Palak

Akap kemaghi, Dang Tejo begetang palak. Palak ble pening, idung kedat, penginaan merilingan. Dasar ngingilan, Bedul bukan prihatin nginak kondisi bapak. Ble malahan komentar  nyakitkah ati. “Cacam, ngapo Bak begetang palak, luak pendekar jak Gunung Bungkuak,” kato Bedul sambil tetawo. Bedul (belum ESHA) nido keruan bapak palak pening gara-gara mikirkah ble itulah, bukan buidapan nian.

Malam kemaghi, Bedul ngiciak dengan Mak dan Bak, ble ndak melanjutkah kuliah ke program S2. Amun lah tamat kelo, lebiah gerut lagi, Bedul Mustofa Satria Raja Mandala ESHA EMHA. Ndak kuliah di peguruan tinggi negeri di Jakarta, dosen hebat, rajin masuak tivi.

“Aku ndak langsung beguru dengan Pakwo Profesor Yusril Ihza Mahendra,” kato Bedul ngemburak.

Dang Tejo ndukung nianan kekendaan anak lanang semato wayang tuh. Masalaho, pertamo kuliah Es Satu bae belum udim, mangko cecaka ndak ngambiak ES Duo. Masalah keduo, ke mano ndalak tanci batan biaya. “Amun Mak betanci, jangankah ES  Duo, ES tujuah bae Mak beli sekaligus batan kaba Dul,” kato Mak Bedul dengan spaning tinggi. “Hehe, bukan mbeli es krim,” kato Bedul sambil cecengiah.

Dang Tejo pasti bae pening luak aso teteguak miling (kemiri). Mbak kini ble lagi neralip nian (nido betanci). Subsidi jak jaringan Ngo internasional lagi kosong. Kebun para nido ngasilkah lagi, gegara rego getah para murah. Kebun sawit di Kecamatan Lubuak Sandi belum ndatangkah tanci.

Ndak minjam tanci dengan mandan lamo Pak Rugat, teghaso malu. Padahal kawan seperjuangan tempo dulu tuh, mbak kini lah kayo nian. Kebun sawit libagh, ingunan sapi sepadangan, ado pula kolam ikan. Pacak bae amun ndak minjam sejuta duo juta nih. Cuman Dang Tejo nido tekiciak. Ke mano ndalak batan biaya Bedul kuliah ES Duo, belum terupuak. Dasar Bedul, galak nian meningkah palak gaek. (sop)