Sertifikat Tanah

Kemaghi Dang Tejo Sorono pegi ke kawasan Ulu Talo, lanang tu ndak nemui kepala desa mandan ble nyo tekenal banyak kebun deghian. Tujuan Dang Tejo ndak betanyo jadwal Prona tughun. Kareno Dang Tejo ndak ngurus sertifikat kebun jeghing ngan kebun deghian di kawasan Ulu Talo.

“Kalau taun ini lah udim dang, kito tunggu bae taun depan. Tapi kami lum dapat kejelasannyo, apokah ado apo nido,” kato kades tu.

Dang Tejo ngan kades tu telibat obrolan panjang libagh. Sampai sampai ughang duo tu mbahas kemungkinan inovasi caro pemerintah mbuat sertifikat tanah kedepan.

“Kalau kini batas tanah ni empat selatan, utara, timur ngan barat. Lum ado batas atas. Aku yakin kedepan bakal ditetapkah batas atas,” kato Dang Tejo. Kades tu nyenghigh bae, lanang tu nganggap kato Dang Tejo tu nidokah mungkin tejadi.

“Cubo kaba pikir, misal di sebelah kidau ngan sebelah kanan ni tanah jemo seughang. Ado tanah tejepit di tengah tengah. Kalu jemo nyo punya tanah di sebelah kiri ngan sebelah kanan tadi mbangun gedung betingkat. Misal 40 tingkat. Bagian atas gedung disatukah, jadi tanah jemo nyo di bagian bawah tadi tekurung luak goa,” kato Dang Tejo.

Pak kades cecengiah bae sambil sesekali ngighup kupi. “Entah luak apolah Dang, tapi kalau di badah kito ni aku raso belum kah tejadi hal luak itu. Entah di Jepang luak apolah,” kato Pak kades. Ughang duo tu samo samo nggagak tetawo. (red)