Masuak Tivi

Udim makan malam, Dang Tejo ngadokah rapat keciak, amun baso jemo dusun, beijo anak beghanak. Masalah nyo dibahas, apolagi  kalu bukan anak lanang sughang tuh, Bedul Mustofa Satria Raja Mandala (belum ESHA).

Semestio, bujang ngingilan tuh lah tamat kuliah, lah nyandang gelar Bedul Mustofa Satria Raja Mandala SARJANA HUKUM (ESHA). Cuman ble tuh nido pati datang ke kampus. Ble banyaklah kulu kiligh pakai mutur besak warna abang buntui-buntui dengan kundang kantin, cewek ataupun cowok.

“Lah ampir sepuluah semestir kabah kuliah, ngengapo cak mbuat sekerispi belum kilah,” kato Ncekwo Sofiah mulai bejijia. Dasar ngingilan, Bedul masiah cecengiah bae, luak nido besalah. “Salah dosen, ngapo agi lum ngenjuakkah gelar sarjana,” kato ble njawab sekendak ati. 

Dang Tejo tambah purik. Mpuak sayang nianan dengan anak lanang tuh, ble langsung ngeluaghlah ultimatum. “Amun baka nido kah ngucup kuliah, tahun muko mandak bae. Tulungi Mak kaba bekebun,” kato Dang Tejo  sambil kisit jak badah duduak. Bedul ndak membela diri, nido ado lagi kesempatan.

Semestio, Bedul hampir nyelesaikah kuliah tahun belakang di Fakultas Hukum di perguruan tinggi tekenal di Kota Bengkulu. Kalu gelar ESHA tuh lah nempel di belakang namo, ble ndak merantau ke Jakarta, ndak njadi praktisi hukum.

Sesekali  masuak tivi, ngikut acara bedebat jemo-jemo pintar nyo mbahas masalah hukum denio angat. “Aku ndak melawani Tulang Ruhut Sitompul, Profesor Pakwo Yusril Ihza Mahendra, Profesor Wak Refli Harun. “Ughang kambangan tuh hebat nian masalah hukum, aku kudai lawano. Aku nih pintar pulo masalah hukum pidana, perdata, tata negara, hukum alam ngan hukum rimba temasuak hukum karma,” kato Bedul ngota dengan Mak ble.

“Dul-Dul luak mano ndak bedebat di acara I-EL-CE (maksudnya ILC Tivi Wan), amun kuliah nido kilah tamat,” kato Mak Bedul madakkah anak lanang tuh. (sop)