Dang Tejo ngan Ncekwo Sofiyah dapat rejeki nomplok. Duo serekanan tu dapat deghian diruntuhi beghuak.
Nelapak deghian di bawah batang, asing masak asing pulo nyo memanyuakan. Ado pulo nyo lah nyempengar embonyo.
“Kalu deghian bantal kato jemo tu tini Dang, bebesak nian buaho,” kato Ncekwo Sofiyah.
Ceritonyo tu, Dang Tejo ngan Ncekwo Sofiyah ndak ke kebun kupi, waktu bejalan keting melalui ghimbo, Dang Tejo ngan Ncekwo nyuruak di bawah batang deghian.
Selamo ni deghian itu nido pernah bebuah, nah entah ngapolah taun ini bebuah lebat.
Sibuk Ncekwo ngan Dang Tejo melundangi deghian nyo masiah mata. Nyo lah masak ngan memanyuakan di sipakkah rencana ndak dibatak baliak bekukak.
“Nyo memanyua’n dengan nyo masak ni kito batak baliak bekulit bae, pacak kito jual, nyo mata ni kito lundangi bae,” kato Dang Tejo.
Magas ughang duo serekanan tu. Kinjagh lumbung nyo lah banyak patah lidi tu lah penuah, basahan belacu lah penuah pulo.
“Sisahau ni kito lungguakkah bae di ghugup ni, pagi kito ulangi,” kato Dang Tejo sambil nembukut ngambin lundang.
Kinjagh lumbung tuangan 13 ambinan Ncewo Sofiyah penuah ngan lundang. Sementaro Dang Tejo mikul deghian nyo masiah bekulit. Saking beghat bataan, nggut ndapatkah badah pelabuahan mutur, Dang Tejo tigo kali beghadu. (nad)