Akap kemaghi, Dang Tejo berayak ke ghumah mandan lamo, Pak Rugat SE, MM di Kota Bengkulu. Cacam-cacam, alangkah gerut Pak Rugat mbak kini. Ghumah luak hotel bintang duo, dijago jemo lanang ughang duo pulo. Setum banyak tegalau, ado warna hitam, putiah, abang, ijang, kuning, kelabu, biru, ungu. Pakai ban keciak nianan, ado pulo ban besak tegalau. Mutur cak tigo buah, kerita angin ado limo. LENGKAP!
“Cacam-cacam alakah kayo kaba nih Gat,” kato Dang Tejo temangah. Pak Rugat tesenyum keciak sambil dedepus ngudut, nido nimbal.
Singkat cerito, Dang Tejo langsung nyampaikah keluhan. Baso anak lanang ble, Bedul Mustofa Satria Raja Mandala ndak nyeselaikah kuliah ES SATU fakultas hukum kekiro setahun. Udim tuh ndak melanjutkah ke ES DUO di Jakarta. Ndak tanci besak titu, sementaro aku ngan ncekwo kaba dang neralip nian,” kato Dang Tejo. Mpuak kawan lamo, ble nido ndak minjam, apolagi mintak. “Aku cuman ndak mintak saran, amun istilah mbak kini aghi, SOLUSI,” kato Dang Tejo.
Sambil ngighup aiak kupi, Pak Rugat langsung nemukah solusi. Dang Tejo diajung bekebun jagung cak tigo atau empat musim. Pak Rugat ngadokah beniah sekaligus ngupah mbukak lahan. “Ado lahan aku di Teluk Sepang. Luas ceput mato nginak. Jak pinggir dusun nggut ke pinggir pantai,” kato Pak Rugat ngantiak.
Nah, amun ditanami jagung cak empat rimbak (empat musim), lah beghapo ton dapat pipilan jagung. Dapat ctanci tigo kantong asoy besak, lah ceto alias lah cengki alias hampir pasti.
Dang Tejo lah riang, apolagi Ncekwo Sofiah ngan Bedul memang lah lamo ngiciak ndak bekebun jagung batan biaya kuliah pogram ES DUO.“Terimo kasiah sanak amun luak itu. Minggu muko amun pacak lah nugal (betanam),” kato Dang Tejo sambil nyintak guring pisang sabo angat dalam piring, nyo mpai ditepiakkah jemo ghumah Pak Rugat.
Mandan lamo sekaligus kawan seperjuangan ble tuh memang lah kayo. Kebun sawit tujuah luang tujuah pematang, tujuah julat enggang terbag. Ternak sapi melibaran, nido keruan lagi beghapo ikuak, dipadangkan di kebun sawit itulah. Sawah di Padang Betuah Bengkulu Utara libagh pulo, kekiro limo lawan tiang listrik dikali 500 meter ke belakang.
Kulam ikan selibagh dusun, isio ikan mas, nila, patin, ghuan, sepat, puyu (betuk), keli (lele), gurami, buayo mungkin ado pulo. Tanah perumahan di delapan penjuru mato angin Kota Bengkulu, ado galo. Ghumah nyolah udim kekiro limo buah, ble sewakah ngan kantor perusahaan.
Cacam-cacam Pak Rugat, jangan diambiak galo tanah di permukaan denio nih. Pikirkah kawan seperjuangan nyo masiah saro. Hehehe. (sop)